» Рак На Дојка
Рак На Дојка

Рак На Дојка

Симптоми, стадиуми и третман на рак на дојка

Ракот на дојката е најчестиот вид на рак кај жените. „Аџибадем“ обезбедува висококвалитетна медицинска нега за дијагностицирање и третман со одлични резултати.

Се здружуваме против ракот на дојката при што обезбедуваме најдобро партнерство почнувајќи од рано дијагностицирање до крајот на вашето лекување. Со повеќе од 20 години искуство, тим од 50 специјализирани здравствени работници, технолошки достигнувања од светски ранг и мултидисциплинарен пристап, ние сме тука да го победиме ракот на дојката.

Што е рак на дојка?

Ракот на дојката се јавува кога абнормални клетки почнуваат да растат и да се размножуваат вон контрола. Тие клетки формираат туморска маса која може да биде или бенигна (неканцерогена) или малигна. Бенигните тумори се абнормални израстоци кои не се шират надвор од дојките и не се опасни по здравјето. Ракот на дојката се однесува на малигнен тумор кој започнува во каналите или лобусите на дојката и има потенцијал да се прошири (метастазира) во други делови од телото.

Како изгледа ракот на дојката?

Всушност, раните знаци за рак на дојка полесно се чувствуваат отколку што се гледаат. Редовните  самопрегледи им помагаат на жените да се запознаат со нормалниот изглед на дојките, да ги почувствуваат и брзо да забележат какви било промени. Ракот на дојката често пати се чувствува како грутка во дојките. Иако многу видови на рак на дојка можат да предизвикаат грутка, тоа не се случува кај сите. Покрај тоа, грутките на дојките се многу чести, а повеќето од нив не се рак. На пример, цисти на дојка, фиброаденоми или аденоза се бенигни состојби кои можат да предизвикаат грутки. Туморите на рак на дојка се чувствуваат тврди на допир. Доколку откриете некоја нова грутка, што се чувствува тврда и неподвижна, треба да закажете преглед.

Причини за рак на дојка

Точните причини за развој на рак на дојка сѐ уште не се јасни. Главните ризици за кои сме свесни се едноставно тоа што сте жена и стареењето. Две третини од пациентите со рак на дојка се жени над 50 години, а повеќето од останатите се на возраст меѓу 39 и 49 години. Наследните генски мутации предизвикуваат до 10% од случаите на рак на дојка. Наследна мутација на тумор-супресорните гени BRCA1 или BRCA2 значително го зголемува ризикот за развој на болеста. Покрај тоа, жена чија мајка, сестра или ќерка имале рак на дојка, е со два до три пати поголема веројатност да заболи. Денес, луѓето со семејна историја можат да направат генетско испитување и проценка на ризик за да донесат информирани одлуки за нивното здравје.

Покрај факторите на ризик што не можеме да ги контролираме, постојат некои избори околу начинот на живот што можеме да ги смениме со цел да ги подобриме шансите. На пример, зголемувањето на телесната тежина го зголемува ризикот за рак на дојка, особено кај жените во менопауза. Жените кои користат апчиња за контрацепција, хормонска заместителна терапија, немаат деца или имаат прво дете по 30-годишна возраст, исто така, може да се соочат со поголем ризик. Седентарен начин на живот и консумирање алкохол, исто така, го зголемуваат ризикот. Во исто време, редовното вежбање и физичките активности го намалуваат ризикот од рак на дојка.

Дали мажите можат да заболат од рак на дојка?

Оваа болест најчесто се јавува кај жените, но ракот на дојка кај мажите, исто така, е можен. Мажите сочинуваат помалку од еден процент од сите откриени случаи. Ракот на дојка кај мажите се формира во ткивото на дојките, како и кај жените. Семејната историја, некои генетски нарушувања, изложеност на естроген или зрачење, како и дебелина и консумирање алкохол, може да придонесат за поголем ризик за развој на рак на дојка кај маж. Важно е да се знае дека и мажите можат да заболат од рак на дојка. Поради недостаток на свест, мажите често ги игнорираат раните знаци на болеста и се консултираат со лекар во подоцнежните стадиуми. Ако се открие рано, ракот на дојка кај мажите има слична прогноза и стапки на преживување како кај жените.

Рани знаци за рак на дојка

Повеќето жени немаат никакви физички знаци за рак на дојка за време на дијагностицирањето. Додека туморот е сѐ уште мал, вообичаено не покажува алармантни знаци. Оттука, редовниот скрининг е клучен за рано откривање.

Симптоми на рак на дојка

Ракот на дојката вообичаено се поврзува со појава на грутка на кое било место на дојките или под пазувите. Сепак, постојат многу други знаци на предупредување, како:

• Секоја промена во големината, обликот или текстурата на дојките;

• Деформитети на брадавицата, како што е повлекување на брадавицата (навнатре) или инверзија;

• Промени на кожата, како влабнување на површината, изглед како кора од портокал, иритација, осип;

• Област слична на мермер под кожата;

• Исцедок од брадавиците што може да биде или бистар или жолт, крвав, итн.;

• Болка во дојките која не поминува со следниот менструален циклус;

• За сѐ што се чувствува различно или невообичаено, мора да се јавите на лекар.

Симптомите на рак на дојка може да варираат од личност до личност или во зависност од специфичниот вид.

Видови на рак на дојка

Ракот на дојката не е ист. Тумор може да појави од различни делови на дојката. Во речиси 85% од сите случаи, туморот се појавува во епителот на каналите што носат млеко до брадавицата (дуктален карцином), а до 15% од случаите започнуваат во жлезденото ткиво на дојката (лобуларен карцином). Во ретки случаи, започнува во други ткива на дојката, но тие вообичаено се видови на саркоми и лимфоми и не се сметаат за рак на дојка.

Првично, канцерогениот развој е ограничен на каналот или лобулот, што се нарекува „in situ“ или неинвазивен рак на дојка. Со текот на времето, „in situ“ видовите може да напредуваат и да се инфилтрираат во околните ткива, претворајќи се во инвазивен рак на дојка. Најчеста форма е инвазивниот дуктален карцином (ИДЦ), опфаќајќи околу 80% од сите случаи, а потоа следи инвазивниот лобуларен карцином (ИЛЦ) со зачестеност од 10-15%. Исто така, постојат некои ретки видови на рак на дојка, како што е Пеџетовата болест што влијае на брадавицата; филоди тумори што се развиваат во сврзното ткиво на дојката; воспалителен рак на дојка кој е многу агресивна форма, итн.

Покрај тоа, туморите на дојката може да се одредат според статусот на нивниот хормонски рецептор. Околу две третини од нив имаат потреба од женските хормони естроген или прогестерон за да растат и да се размножуваат. Клетките на ракот имаат рецептори што им овозможуваат да ги фатат и да ги користат хормоните. Тие се класифицирани соодветно како ЕР-позитивни или ПР-позитивни. Кај овие случаи, терапијата за блокирање на хормоните може да го запре растот на туморот. На туморот што е хормон-рецептор-негативен (ХР-негативен) хормонската терапија не би влијаела. Ракот на дојката, исто така, може да биде ХЕР2-позитивен или негативен. Тоа се однесува на нивоата на протеинот наречен рецептор на хуман епидермален фактор на раст 2. Високите нивоа го поттикнуваат ракот, кој е наречен ХЕР2-позитивен рак на дојка. Кога не е откриен ниту еден од трите рецептори, се смета за тројно-негативен рак на дојка. Бидејќи секој вид бара различен третман, точноста на тестирањето е од суштинско значење за ефективен третман. Дијагностицирањето на точниот вид на рак на дојка и колку е раширен во телото ја одредува стратегијата за лекување и им помага на лекарите да обезбедат најдобра можна нега.

Дијагностицирање на рак на дојка

Стекнатото знаење и напредната опрема овозможуваат рано откривање на ракот на дојката, понекогаш години пред да покаже видливи симптоми. Процес на дијагностицирање вообичаено започнува со снимање. Мамографот кој дава рентген снимка на дојката и ултразвукот кој користи звучни бранови со висока фреквенција, веќе долго време се препознаваат како главни алатки за дијагностицирање на рак на дојка. Денес, специјализираните центри за болести на дојка имаат на располагање разни техники на мамографија. Дигиталната мамографија овозможува да се добијат снимки од дојките во дигитален формат на компјутерски екрани. 3Д-мамографија со томосинтеза овозможува тродимензионални дигитални снимки со ниски дози на зрачење. 4Д-ултрасонографија на дојка или автоматски ултразвук помага да се добие добар увид дури и во густо ткиво на дојката.

Ако со снимањето се откријат сомнителни наоди, дел од сомнителното ткиво треба да се испита од патолог под микроскоп. Тоа се нарекува биопсија. Биопсиите може да се земаат на различни начини, вообичаено со помош на уред со игла и наведувано снимање.

Во клиника „се на едно место“, пациентите имаат можност да ги направат сите потребни испитувања за време на истата посета. Во „Аџибадем“, нашите искусни лекари располагаат со најсовремена опрема за дијагностицирање на рак на дојка, вклучително и некои уреди достапни само во ограничен број институции во светот.

Стадиуми на ракот на дојка

Стадиумите на ракот на дојка ги опишуваат големина и раширеноста на ракот низ телото. Вообичаено ракот се класифицира на скала од 0 до IV, при што поголемите бројки укажуваат на поинвазивен рак. Стадиум 0, исто така, е наречен неинвазивен рак на дојка или преканцерогено заболување. Тоа значи дека постојат абнормални клетки, но тие се ограничени на млечните канали или жлезди и не ги напаѓаат околните ткива (карцином in situ). Од друга страна, ракот на дојката во стадиум IV е напредна состојба кога туморот се шири во далечни делови од телото, можеби органи или коски.

Покрај одредувањето на стадиумот, одредувањето на степенот на ракот на дојката дава дополнителни информации колку клетките на ракот се разликуваат од нормалните и колку бавно или брзо се очекува туморот да расте. Рак од низок степен значи дека абнормалните клетки изгледаат слично на нормалните, и најверојатно тие ќе растат бавно, додека ракот од висок степен е токму спротивното.

Кај ново-дијагностицираните пациенти, одредувањето на стадиумот и степенот на ракот на дојката, заедно со хормонскиот рецептор и статусот ХЕР2, имаат суштинско значење за да му помогнат на медицинскиот тим да одлучи за најдобрите опции на лекување.

Третман за рак на дојка

Во денешно време, третманот за рак на дојка е многу ефикасен и постојано се подобрува. Процесот на лекување може да опфати хирургија, радиотерапија, хемотерапија, хормонска терапија, насочена биолошка терапија или имунотерапија.

Хемотерапија. Се користат лекови за уништување на брзо-растечките клетки, вклучително и клетките на ракот, низ телото. Повеќето пациенти ја добиваат после операција, но може да се даде и пред операцијата за да се намали туморот.

Хормонска терапија. Тоа значи лекови што се користат за да се спречи растот на клетките на ракот со блокирање на хормоните или запирање на продукцијата на хормони. Само хормон- рецептор позитивните карциноми на дојка реагираат на хормонска терапија. Вообичаено тоа е долгорочен третман кој трае 5 до 10 години за да се спречи повторување на ракот.

Целна терапија. Биолошките терапии, водени од напредокот во генетиката и молекуларната биологија, се меѓу најважните достигнувања во третманот на ракот во последно време. Тие користат лекови кои можат да идентификуваат цели што се присутни во канцерогените клетки, но не и во нормалните клетки. Така здравите клетки не се напаѓаат, а несаканите ефекти се намалуваат во споредба со стандардната хемотерапија. Постојат различни опции за целна терапија во зависност од специфичниот вид на рак на дојка. Може да се направат тестирања на клетките на ракот за да се провери дали лекот би бил ефикасен или не.

Имунотерапија. Тоа е нова опција за третман. Имунотерапијата го активира имунолошкиот систем на пациентот да се бори против клетките на ракот. Може да се примени кај некои пациенти со тројно-негативен рак на дојка во напреден стадиум.

Радиотерапија. Зрачењето е локален третман што се користи за уништување на канцерогените клетки со високо-енергетски Х-зраци, електронски зраци и радиоактивни изотопи. Радиотерапијата го спречува растот на клетките на ракот и ги убива. Пациентите кои се на терапија со зрачење во „Аџибадем“ можат да имаат придобивки од линеарните акцелератори со најновите технолошки карактеристики за највисока безбедност и ефикасност.

Центарот за рак на дојка „Аџибадем“ и неговиот експертски тим обезбедуваат целосен опсег на третмани за рак на дојка на едно место, вклучувајќи и некои најсовремени опции достапни во неколку клиники низ целиот свет:

Хирургија. Вообичаено тоа е првиот чекор од третманот, особено кај рак на дојка во ран стадиум. Има за цел целосно или колку што е можно да ги отстрани канцерогените ткива. Кога се отстранува целото ткиво на дојката, тоа се нарекува мастектомија. Порано мастектомијата беше често изведувана операција. Денес се применува кај напредни случаи на рак на дојка или кога во дојката има повеќе тумори. Во „Аџибадем“, првиот избор секогаш е операција за зачувување на дојките, наречена лумпектомија. Тоа опфаќа отстранување на туморот со околу 1-2 см од нормалното ткиво околу него. Потоа се користат онкопластични техники за обновување на дојката и обезбедување добри козметички резултати. Дури и кога е потребна мастектомија, нашите хирурзи се способни да користат нови методи, како што е мастектомија при која се штеди брадавицата или се штеди кожата. Исто како и при стандардната мастектомија, се отстранува целото ткиво на дојката, но комплексот кожа/брадавица-ареола се зачувува за реконструкција на дојките.

Хирургија со помош на робот. Роботскиот систем „Да Винчи“ може да се користи за мастектомија без никакви засеци на дојките, обезбедувајќи високо ниво на точност. Целото ткиво на дојката се отстранува преку мал засек од пазувите. Потоа следи поставување протетика преку истиот засек. Роботската операција за рак на дојка дава подобри козметички резултати бидејќи нема засеци на дојките, а засекот под раката лесно може да се сокрие.

Радиотерапија со една доза. Кај соодветни пациенти со рак на дојка, радиотерапијата може да се изведе во една сесија за време на операцијата, додека засекот сѐ уште не е затворен. Се користи зрачење во високи дози точно само во тој регион, во самото лежиште на туморот, заштитувајќи го здравото ткиво наоколу. Интраоперативна терапија со зрачење (ИОРТ) со помош на роботски уред може да се користи на три начини: кај пациенти во постменопауза со мали и хормонски чувствителни тумори како единечна доза по операција за зачувување на дојките; кај пациенти во пременопауза со мали тумори чувствителни на хормони како засилување на зрачењето; и кај пациенти кои имале мастектомија при која се штедат брадавиците, за да се намали ризикот од повторување.

Директна реконструкција на дојките. Наместо одложена реконструкција на дојките, кај многу пациенти постои можност отстранетото ткиво да се врати за време на истата операција, користејќи протетика на дојка или ткива од пациентот. Во „Аџибадем“ се применуваат најновите реконструктивни техники за да се врати природниот изглед на дојките заболени од рак.

Стапка на преживување кај ракот на дојката

Стапките на преживување го претставуваат процентот на пациенти со рак на дојка кои преживуваат одреден период откако ќе им биде дијагностициран рак. Вообичаено, се зема предвид преживување од 5 години, со оглед дека повторувањето по тој период е помалку можно.

Медицинскиот развој во дијагностицирањето и лекувањето на ракот доведе до зголемена стапка на преживување. Во денешно време, третманот за рак на дојка може да биде многу ефикасен, и да се постигнат шанси за преживување од 90% или повисоки, покажуваат податоците на Светската здравствена организација (СЗО). Сепак, стапките на преживување зависат од видот на ракот, стадиумот, специфичните карактеристики и стручноста на медицинскиот тим што го спроведува третманот.

Статистика за ракот на дојката

Ризикот кај жените да развијат рак на дојка до крајот на животот е околу 12%. Според податоците на СЗО, половина од случаите на рак на дојка се развиваат кај жени кои немаат препознатливи фактори на ризик, освен полот и возраста (над 40 години). Денес третманот за рак на дојка може да биде многу ефикасен, постигнувајќи стапки на преживување од 90% или повисоки.

Зошто „Аџибадем“ за третман на рак на дојка во Турција?

Сѐ поголемата разновидност на опции за третман бара интегриран пристап, со тим за нега составен од искусни специјалисти во различни гранки, земајќи ги предвид специфичните потреби на секој пациент.

Центарот за рак на дојка „Аџибадем“ веќе 30 години обезбедува услуги на пациенти од целиот свет. Тука се користи мултидисциплинарен пристап за сите пациенти, со експерти по општа хирургија, медицинска онкологија, онкологија на зрачење, козметичка и пластична хирургија, радиологија, патологија и генетика, посебно специјализирани за третман на рак на дојка. Ние сме многу успешни во дијагностицирањето и лекувањето на ракот на дојката, благодарение на нашиот мултидисциплинарен пристап, високотехнолошка инфраструктура и тимови на специјалисти од светски ранг.

Горди сме што сме домаќини на првиот и единствен високо-образовен сертифициран институт за рак на дојка, наречен Истражувачки институт за сенологија на „Аџибадем“. Тоа е научен центар  што придонесува кон глобалните сознанија за ракот на дојката преку истражување и акумулирано знаење.

ТРЕТМАН

ТЕХНОЛОГИЈА

ACIBADEM

×
Search