Неврологија И Неврохирургија

Одделите за неврологија и неврохирургија во болниците „Аџибадем“ во Турција обезбедуваат напредни опции за лекување на заболувања на мозокот, ‘рбетот и нервниот систем.

Што е неврологија?

Неврологија е медицинска гранка која се занимава со разни заболувања на нервниот систем. Тие можат да влијаат на централниот нервен систем (мозокот и ‘рбетниот мозок) или на периферниот нервен систем (нервите кои се протегаат на сите делови од телото). Се смета дека 1 од 6 луѓе заболува од невролошки заболувања. Лекар специјализиран за невролошки заболувања се нарекува невролог. Специјалистите за неврологија се обучени да дијагностицираат и третираат состојби како што се мигрена, мозочен удар, епилепсија, повреди на нервите, хидроцефалус, мултиплекс склероза, Паркинсонова болест, Алцхајмерова болест, тумори на мозокот, тумори на ‘рбетниот мозок и многу други. Дијагнозата и третманот на невролошките заболувања често бараат експертиза од различни медицински специјалисти. Сеопфатните невролошки центри како „Аџибадем“ можат да понудат мултидисциплинарен пристап, со специјалисти за неврологија, радиологија, интервентна радиологија, онкологија, ортопедија, физикална терапија и неврохирургија, сите на едно место.

Што е неврохирургија?

Невролошката хирургија, или скратено неврохирургија, подразбира оперативен третман на невролошки состојби. Додека специјалистите за неврологија можат да користат лекови и неоперативни процедури, неврохирурзите можат да обезбедат и хируршки и нехируршки решенија. Во напредните невролошки клиники, неврохирурзите честопати се потпомогнати од високотехнолошки уреди за интраоперативна визуелизација и невролошко снимање со цел да се подобрат стапките на успех и безбедноста на пациентот.

Симптоми на невролошки заболувања

Постојат повеќе од 600 невролошки заболувања кои може да се манифестираат со различни знаци и симптоми. Може да бидат засегнати говорот, движењата, дишењето или менталните способности, во зависност од конкретната состојба и деловите од телото што ги опфаќа. Сепак, најчестите симптоми на болестите на нервниот систем вклучуваат:

• Постојана или силна главоболка
• Не-провоцирани напади или тремор
• Јазично оштетување или нејасен говор
• Заболување на движењето, бавни или несмасни движења, атаксија
• Мускулна вкочанетост, слабост или губење на силата
• Болка во грбот која се шири кон стапалата, прстите или други делови од телото
• Загубен, заматен или двоен вид
• Вкочанетост или пецкање на кој било дел од телото
• Необјаснето гадење или повраќање
• Губење на меморијата, конфузија и оштетени когнитивни способности
• Проблем со рамнотежа или недостаток на координација
• Промени во однесувањето, потешкотии со секојдневните активности

Овие симптоми може да укажуваат и на други состојби, но доколку почувствувате некоја од нив, веднаш консултирајте се со лекар. Невролошки преглед и дополнителни тестови можат да помогнат за навремена дијагноза.

Невролошки состојби

Невролошките заболувања може да бидат предизвикани од различни причини, како што се повреда на мозокот или повреда на ‘рбетот, неисправни гени (Хантингтонова болест), инфекции (менингитис) или дегенеративни промени (Алцхајмерова болест). Некои од нив се чести (мигрена), додека други се ретки (Гилен-Бареов синдром). Во продолжение се наведени некои состојби кои често се третираат во „Аџибадем“:

Тумори на мозокот

Тие можат да се јават во самиот мозок (примарен тумор на мозокот) или да мигрираат од рак лоциран на друго место во телото (секундарен тумор на мозокот). Примарните тумори на мозокот вообичаено се именуваат според видот на клетките: глиоми, менингиоми, акустични невроми, аденоми на хипофизата итн. Постојат над 120 видови на мозочни тумори, но сите не се канцерозни. Тие се класифицирани во 1-4 степени, во зависност од тоа колку клетките на туморот се разликуваат од нормалните. Степенот 1 и 2 се неканцерозни, додека туморите од 3 и 4 степен се малигни.

• Бенигни тумори на мозокот. Тие вообичаено растат бавно и не се шират во други области. Сепак, бенигните тумори на мозокот, исто така, може да предизвикаат симптоми со притискање на околните ткива. Менингиом е најчестиот вид на тумор на мозокот и во повеќето случаи е бениген. Краниофарингиоми, шваноми, хемангиобластоми и глиоми од низок степен се други примери на неканцерозни тумори. Иако ретко, некои бенигни тумори може да се претворат во малигни.
• Малигни тумори на мозокот. Тие веројатно ќе растат и ќе се шират брзо. Астроцитоми, олигодендроглиоми, глиобластоми се вообичаени видови на малигни тумори на мозокот. Glioblastoma multiforme е брзорастечки и агресивен вид што се инфилтрира во околните области.
• Тумори на хипофизата. Тие потекнуваат од хипофизата која е одговорна за ослободување на хормоните во телото. Туморите на хипофизата се класифицирани како бенигни аденоми на хипофизата и малигни карциноми на хипофизата.

Симптомите на тумор на мозокот се слични кај сите видови. Најчестиот симптом е главоболка предизвикана од зголемен интракранијален притисок. Кај некои пациенти може да се забележат повраќање или напади. Во зависност од големината и локацијата на туморот, може да се забележат некои локализирани симптоми, како хемипареза, еднострана слабост, нарушувања на видот, проблеми со рамнотежа, ментални промени и промени во однесувањето. Ако постои сомневање за рак на мозокот, невролошки преглед и различни методи на снимање помагаат да се дијагностицира состојбата. Скенирањето со магнетна резонанца им овозможува на искусните лекари не само да го видат туморот туку и да го проценат видот и дали е бениген или малиген со точност од 92-93%.

Епилепсија и напади

Епилепсијата е невролошко заболување кое се карактеризира со абнормална активност на мозокот што предизвикува не-провоцирани напади. Постојат различни видови на епилептични напади, кои варираат од празно зјапање неколку секунди до грчеви и тресење на целото тело. Тие можат да се класифицираат како фокални или генерализирани, во зависност од тоа дали потекнуваат од една или повеќе области на мозокот. Сигурна дијагноза се заснова на детална медицинска историја на пациентот, нападите и нивните начини на појавување, проследени со различни дијагностички испитувања. Тие може да вклучуваат ЕЕГ (електроенцефалографија), кранијална МР (магнетна резонанца), ПЕТ, СПЕКТ и невропсихолошка евалуација.

Паркинсонова болест

Паркинсоновата болест (PD) е прогресивно дегенеративно заболување на централниот нервен систем. Тоа е предизвикано од загуба на мозочните нервни клетки кои продуцираат невротрансмитер наречен допамин. Симптомите на Паркинсоновата болест може да вклучуваат тремор, бавни движења, крути мускули, проблеми со рамнотежа, координација и држење на телото. Пациентите, исто така, може да имаат нарушено спиење и говор, промени во ракописот, тешкотии во исхраната, когнитивно и ментално оштетување. Симптомите на Паркинсоновата болест имаат негативно влијание врз квалитетот на животот. Во напредна фаза, на пациентите може да им биде потребна помош со полно работно време во секојдневниот живот.

Цереброваскуларни болести

Цереброваскуларните болести опфаќаат широк спектар на заболувања поврзани со крвните садови и протокот на крв во мозокот. Циркулацијата на крвта може да биде попречена од стеснување на садовите (стеноза), или блокирана од згрутчување на крвта. Кога снабдувањето со кислород до мозокот е прекинато, тоа може да предизвика оштетување на мозокот и мозочен удар. Одделот за неврологија и неврохирургија на „Аџибадем“ ги третира сите видови цереброваскуларни заболувања, вклучувајќи:

• Церебрални аневризми. Аневризмата е слаба, мала точка во крвен сад во мозокот. Руптурата може да предизвика крвавење опасно по живот.

• Артериовенски малформации (AVMs). AVMs е група на абнормални заплеткани садови во мозокот. Ако не се третираат, тие можат да се зголемат и да се кинат.

• Кавернозни малформации. Церебрална кавернозна малформација е формирање на абнормални крвни садови во мозокот кои може да истекуваат или крвават.

Дискус хернија

Дисковите на ‘рбетот служат како перници кои го апсорбираат притисокот помеѓу пршлените што го формираат’ рбетот. Составени од ‘рскавица и сврзно ткиво, здравите дискови помеѓу пршлените може да ја загубат својата флексибилност, да се истрошат. Дегенерацијата може да биде предизвикана од стареење, седентарен начин на живот, кревање тешки тежини или трауми и несреќи. Последователно, дисковите на ‘рбетот може да се наѕираат или испакнат, што резултира со хернија на дискот или испакнат диск. Покрај тоа, дискус хернија може да иритира или компресира некои нервни корени, предизвикувајќи болки во грбот или болки кои започнуваат во вратот и се протегаат до рацете или нозете. Лицето почнува да чувствува вкочанетост, слабост, губење на сензација и нарушени моторни вештини во делови од телото поврзани со зафатените нерви. Хернија може да се јави во кој било дел од ‘рбетот. Најчесто се развива во вратот (хернија на цервикалниот диск) или долниот дел на грбот (лумбална дискус хернија).

МР е најчесто користениот метод за дијагностицирање на дискус хернија, заедно со КТ скенирање за подобар квалитет на снимката. Дефинитивната дијагноза за тоа дали нервите се зафатени или не се поставува со електромиографија (ЕМГ).

Тригеминална невралгија

Тригеминална невралгија се манифестира со епизоди на ненадејна и силна болка на лицето. Пациентите често ја споредуваат со електричен шок. Се јавува поради компресија на тригеминалниот нерв и може да се почувствува во различни делови на лицето. Болката при тригеминална невралгија може да трае неколку секунди и да расте со текот на времето. Лекови против болки вообичаено не помагаат. Опциите за лекување може да бидат лекови, операција и радиохирургија со гама нож.

Неврохируршки процедури

Неврохирургијата на ‘рбетот и мозокот бара највисоко ниво на прецизност. Затоа, пациентите треба да се упатат во медицински центри со докажани успешни резултати, искусни медицински тимови и врвна технологија за најдобар исход. Во „Аџибадем“ работат некои од најдобрите неврохирурзи во Турција, специјализирани за поддисциплини како што се хирургија на ‘рбетот, невро-онкологија, невроваскуларна хирургија и функционална неврохирургија. Тие се потпомогнати од најновата технологија, вклучувајќи интраоперативен апарат за МР за снимање во реално време во тек на операција, систем за невронавигација за да се спречи оштетување на нервите и „Gamma Knife ICON“ за радиохирургија. Операција на основата на черепот успешно се изведува за тумори на мозокот како што се менингиоми, хордоми, шваноми и васкуларни малформации на базата на черепот како аневризми, артериовенски и кавернозни малформации.

Некои од најчестите видови на неврохируршки процедури кои се изведуваат во „Аџибадем“ се наведени подолу:

Операција на тумор на мозокот

Операцијата е главна опција за лекување на тумор на мозокот. Целта е или целосно да се отстрани туморот или, доколку е лоциран во чувствителна област, да се направи што е можно повеќе ресекција без да се влијае на виталните функции. Во зависност од случајот, операцијата може да опфати краниотомија или помалку инвазивни процедури како што е невроендоскопија. Бидејќи вкупната ресекција на туморот е клучна за преживување, пациентите со рак на мозокот треба да изберат квалификуван хирург и искусен неврохируршки центар. Денес, напредната технологија ги поддржува неврохирурзите да обезбедат повисоки стапки на успех и да ја подобрат безбедноста. Постојат илјадници успешни стории за пациенти со тумор на мозокот од луѓе кои доаѓаат во „Аџибадем“ од целиот свет.

Операција на епилепсија

Приближно 20-30% од пациентите имаат епилепсија отпорна на лекови или рефрактерна епилепсија. Тоа значи дека не можат да ги контролираат нападите со лекови. За некои од овие пациенти, операцијата може да биде алтернатива. Постојат различни видови на операција на епилепсија што се изведуваат во „Аџибадем“:

• Фокална ресекција: отсекување на мала област во мозокот каде што се јавуваат напади
• Корпус калозотомија: сечење на нервните влакна меѓу двете хемисфери на мозокот за да се спречи ширење на нападите меѓу нив
• Хемисферектомија: прекинување на врската на една хемисфера во мозокот со друга во случаи кога е оштетена една страна од мозокот
• Стимулација на вагусниот нерв: прикачување на електрода на вагусниот нерв

Во зависност од случајот, целта на операцијата на епилепсија е да се елиминираат нападите, да се намали нивната фреквенција или да се намали тежината на нападите.

Операција на Паркинсонова болест (длабока мозочна стимулација)

Длабоката мозочна стимулација (DBS) е операција која се изведува за да се контролираат симптомите на Паркинсоновата болест кога лековите не се ефикасни. Операцијата опфаќа имплантација на електроди во одредена област на мозокот за да се регулира електричната активност нарушена од болеста. Областа се одредува прецизно преку томографија на мозокот и снимки од МР. Операцијата DBS е одржлива опција за луѓе во напредна фаза на Паркинсонова болест кои се отпорни на терапија со лекови или имаат премногу несакани ефекти. За многу од нив, операцијата дава шанса да се подобри квалитетот на животот.

Цереброваскуларна хирургија

Денес, цереброваскуларните заболувања можат успешно да се третираат од искусни медицински тимови, потпомогнати од напредна технологија. Мозочен удар, мозочни аневризми, артериовенски малформации, кавернозни малформации и други невроваскуларни заболувања за кои е потребна операција рутински се третираат во „Аџибадем“, вклучувајќи сложени случаи. За оптимални резултати може да се користат минимално инвазивни техники, ендоваскуларни методи, микрохирургија и радиохирургија, во зависност од случајот.

Радиохирургија со гама нож

Гама нож е неинвазивна алатка за стереотактична радиохирургија (SRS) без засеци. Користи повеќе зрачења прецизно фокусирани на болните клетки. Уредот „Гама нож“ може да се користи за лекување на различни проблеми во мозокот, вклучувајќи:

• Бенигни или малигни тумори на мозокот со јасни рабови
• Функционални проблеми, како Паркинсонова болест и тригеминална невралгија
• Васкуларни проблеми во мозокот, како што се артериовенски малформации и каверноми

Лекување на дискус хернија (дискектомија)

Ако на пациентот му е дијагностицирана дискус хернија, лекарот може да препорача краток период на одмор, антиинфламаторни лекови, лекови против болки, физикална терапија, вежби и епидурални инјекции на стероид. Доколку конзервативните третмани не помогнат или симптомите се влошат, пациентот може да има корист од хируршки третман. Дискектомијата е вид на операција што се изведува за да се олесни компресија на нервите со отстранување на дел од дискус хернијата (делумна дискектомија) или целата дискус хернија. Во текот на операцијата, хирурзите треба да бидат многу внимателни да ги раздвојат нервите и да го изложат ткивото на дискот избегнувајќи какво било оштетување. Во денешно време е можно нервите подобро да се заштитат со помош на ендоскопски интервенции или микродискектомија што се изведува со микроскопски пристап. Во „Аџибадем“ се претпочита минимално инвазивна дискектомија која обезбедува побрзо закрепнување на пациентот и брзо враќање во социјалниот живот.

Операција на тригеминална невралгија

Ако лековите не помагаат против симптомите на тригеминална невралгија, може да се разгледаат различни хируршки опции. Може да се примени микроваскуларна декомпресија (MVD), ризотомија, компресија со балон за да се намали или елиминира болката. Можен е и третман со гама нож.

Зошто да изберете „Аџибадем“?

Нашите пациенти можат да имаат корист како:

• Сеопфатна невролошка нега од страна на мултидисциплинарен тим од експерти;
• Пристап до напредни медицински, хируршки и минимално инвазивни опции;
• Третман на сложени и предизвикувачки невролошки болести и заболувања;
• Најнова технологија за најголема безбедност и ефикасност;
• Првокласна услуга за меѓународни пациенти од светски познат бренд за здравствена заштита.